اخواتي عواشر مبروكة ورمضان كريم انشاء الله يدخل علينا بالصحة وستر وراحة البال وبالنجاح والتوفيق لجميع وليدات المسلمين
اليوم صاوبت هاد الشباكية لي تعلمتها من عند لوستي الله ينول ليها مرادها ويفرحها بوليدها ويخلي ايامها كلشي افراح ومسرات
المقادير كالتالي حسب الترتيب تعمليهم في القصعة
2 زلايف خميرة بلدية ضرورية جدا
زلافة زبدة +كاس زيت
خمارة حمراء
كاس الا ربع خل
زلافة جنجلان محمر ومطحون
شوية نافع مطحون ومغربل 2معالق+ملعقة صغيرة قرفة
زلافة صغير لوز مقلي وطحون مزيان
شوية ملون وزعفران شعرة
2بيضات
نصف كاس ماء زهر انا عملت كاس عامر
فرينة حسب الخليط
الطريقة
حطي المقادير بالتتابع وفي الاخير اضيفي الفرينة حتى تجمع تبقاي تدلكي وانتي تزيدي الفورص شوية بشوية حيث ضروري لعجينة تكون قاسحة ..
عمليها كويرات صغار باش ميعدبوكش في التوراق حيث العجين قاصح كما دكرت
والتتمة تشرحا الصور انشاء الله
هنا بنتي غسلت يديها واصرت تجرب تدلكها لكن محال هههه
ضروري تصغري الكرات باش يسهال عليك التوراق كل كويرة نخرج منها 4 ديال الشباكيات متوسطين
الزبدة لي نستعمل في الوصفات لي تتعسل ضروري تكون حيوانية بحال ديال لعبار واليوم استعملت بدوية حيث حتى هي زبدة صفراء
ملاحظة بعض المرات نصاوبها في الليل وحتى لصبح نطيبها وتجي مجعبة وعامرة ثقابي ..هاد النصيحة للي كتبغيها مثقبة وشاربة لعسل او ممكن تخليها ترتاح ساعة عاد طيبها ...وشكرا
اخواتي لا يسعني الا اناستودعكم اللع الدي لا تيع ودائعه وكيف عودتوني دعواتكم لابنائي بالصلاح والتوفيق ...
ليست هناك تعليقات:
إرسال تعليق