Loading...

الثلاثاء، 4 فبراير، 2014

كاشير بالدجاج ساهل وتيجي بنين


السلام عليكم الحادكات
البارح صوبت كاشير وقلت اعلاش مانوريهش ليكم وخصوصا انو تيجي رائع والمقادير فالمتناول
والله سنين وانا تندير هاد كاشير نتمنى يعجبكم كيف تيعجبني ههههههههههه
غادي نحتاجو
4 البيضات
300غ كفتة الدجاج ايلا ماعندكش كفتة الدجاج عوديها ب 2كيسان الروز مسلوق
كاس سميدة رقيقة
نصف كاس زيت
2 فصوص توم
كنور بكري شوية الملح
معلقة صغيرة الكامون
لهريسة حسب الدوق انا تنكتر باش تعطيني احتا اللون
نصف معلقة القزبر مطحون
اللي بغا الملون الاحمر ايديرو انا مادرتوش
تنخلطو كلشي فمولينكس
وها الصور غادة تشرح ليكم

هاهو من بعد ماتطحن مزيان


من بعد نديروه فالكاس الخاص بيه راه موجود فالاسواق وغير ب5 دراهم


من بعد انديرو فبرمة فيها الماء ونتقلو اعليه باش ماطيحش القرعة ويخسر لينا المنضر
ونحسبو ليها 45 دقيقة


من بعد انخليوه يبرد مزيان انا تنفضل انخليه ايبات عاد تنكلو تيجي بنين لامانة انا تناكلو ابلا خبز ههههههههههه

وهاهو الشكل ديالو كيف تيجي


بالنسبة لاخوات اللي مايلقاوش هاد القرعة انا كنت كنديرو غير فبلاستيكة ونسد اعليها مزيان وندوبلها وبنفس الطريقة تيطيب


ليست هناك تعليقات:

إرسال تعليق