Loading...

الجمعة، 21 فبراير، 2014

سفة الروز سالة ماهلة فدقائق وبلا كسكاس


السلام عليكم
حرت اش ندير للعشا وانا نتفكر السفة كتعجبني بزاف و قلت نديرها ونصورها ليكم باش تشوفو طريقتي ساهلة ماهلة ودغي كتوجد و بلا كسكاس بلا عداب.نهار كنبغي نديرها للضياف كنخليها حتال اخر لحضة و نطيبها ونحطها.
بسم الله
اللهم صل على محمد وعلى ال محمد كما صليت على ابراهيم و على ال ابراهيم وبارك على محمد وعلى ال محمد كما باركت على ابراهيم و على ال ابراهيم في العالمين انك حميد مجيدبالنسبة للمقادير على حسب عدد الاشخاص انا درت قياس طبسيل كبير.
نص كيلو روز اصفر كلاصي (كناكد الصفر ماشي لبيض)
3 اعواد قرفة
شوي الملح
شوي الزيت
شوي الزبيب مغسول(اختياري)
الما (لقياس ديال الروز 2 مرات ونص) يعني متلا انا هنا درت زلافة عامرة ونص ديال الروز درت ليها 3 الزلايف ونص دالما

كنديرو الكل فالككوط

نسدو عليها ونديرو الصفارة ونجهدو البوطة وملي تصفر نقصو العافية ونحسبو 13 د ونطفيو

مباشرة ملي نطفيو عليها منحلوهاش ونغطيوها بمانطة ونخليوها شوي

وهاهي واجدة

نحيدو عويدات القرفة ونزيدو الزبدة والسكر

نخلطو مزيان ونقدموها بالصحة و الراحة.على حسب الدوق. انا كان شايط ليا شوي الدجاج محمر من واحد لعشيوة ودفنتها بيه
نخليكم مع الصور

















نصيحة
خصها متصاوب حتى نقربو نقدموها ودغي تقدم لان يلا عطلناها غادي الروز ينشف و يقصاح ونضطرو نعاودو نسخنوه فالكسكاس
نتمنى تجربوها وتعجبكم انا راها معتامدة عندي هادي سنين
المرة الجاية ان شاء الله سفة الشعرية حتى هي بلا كسكاس
اللهم صل على محمد و على ال محمد كما صليت على ابراهيم و على ال ابراهيم وبارك على محمد و على ال محمد كما باركت على ابراهيم و على ال ابراهيم في العالمين انك حميد مجيد


ليست هناك تعليقات:

إرسال تعليق