كيك مقوي بالبنان و اللوز و التمر للصغار و الكبار

بإسم الله

ولدي كما العادة ماشي من النوع الى َوكال و ما تيبغيش يكل البنان و التفاح و حتى الخوخ المهم خاصني

كل مرة و نخترع و لا نصايب شي حاجة يستفد منها بلا ما يعيق، البارح بغيت ندير كيكة باش يدي معاه

للمدرسة

و بديت نخربق و طلعات واعرة وخا واحد الساعة خفت بان لي مقصاحتش من الداخل وخا طابت مزان

ومنين جبدت وحدة و بردتها كانت مزيانة راه غير البنان منين تيكون سخون تيبقي معلك حتى يبرد

عاد يشد راسو طولت ياك

غير واحد النقطة منين مشيت نجيب ولدي سولت واش كلا الكيك ديالوا قالو لي كلاها كاملة

و فرحت حيت كنت خايفة يعيق بالبنان و يرفض ياكل

المقادير

كما في السورة

4 بيضات

نصف كأس سكر سانيدة او اقل حيت التمر حلو

2 كؤس يوغرت فاني اي نوع "دانون ، شركي....

كاس زيت

200 غ تمر مبخر و مفرتت طريفات صغار ميكونش فيه العصب

2 خمارات

2 معالق كاكاو المر

كاس لوز أخضر ممسوح و مطحون مزيان

2 كيسان دقيق " الي ما متوفرش عندها اللوز يمكن دير غير 3 ديال الدقيق"

2 بانانات كل وحدة مقطعة طريفات صغار : وحدة نعملولها داخل الخليط -

و التانية نزوقو بها وجه الكيك

الطريقة : كيف ديما تنخلط البيض مع السكر و بعدها نضيف اليوغرت

بعدها الزيت تم التمر و نحرك مزيان

من بعد التمر نزيد كاس اللوز مطحون ونخلط عاد نزيد الدقيق مغربل من قبل مع 2 معالق كاكاو

و 2 خمارات من بعد ما ينسجم الخليص نزيدو بنانة مقطعة ونحرك من الأسفل الى الأعلى

منين ينسجم الخليط هنا خديت مغرفة و عمرت مولات صغار و حطيت فوقهم طريفات البنان

و دخلتهم للفرن

كل واحد تيعرف قياس فرانو و الوقت الى تتطيب فيه كيكة ديالو

غير منين تعرفوها طابت مزيان وباش تتأكدو تقبوها بقطيب ديال العود

او سكين ماتخافوش الى بان ليك شوية ميدم حيت البنان تيبقى شوية مرخي

حتي تيبرد عاد تيشد راسو-=- هادا لايعني انك تشوفي القطيب

او الموس فيه العجينة و تقولي راه غير البنان الا كانت العجينة راه مزالة ما طاب الكيك-=-

منين بردو مزيان بالصحة و الراحة و الباقي حطيتو مغطي مزيان في التلاجة