غالياتي جبت ليكم طريقة العجين المورق ساهلة وكتطلع فنة
ان شاء الله غتجربوها وغادي تفرحوا من النتيجة صدقوني تتجي فنة ومكطيح لا كتاف لا والووووووووووووووووووا
اليكم المقادير والطريقة انتوما عملوا لعبار على حسابكم القدر لي بغيتي
المقادير
500 غ طحين فورص ممتاز
500 غ زبدة ماركرينا انا استعملت اللدة تكون مقطعة مربعات صغيرة وبايتة فالتلاجة ليلة كاملة باش تكون شادة راسها مزيان
ملح شوية ماء عادي
الطريقة
ناخد الطحين ونحط مربعات الزبدة ونبدا نجمع بيدي وانا تنزيد الماء غي شوية بشوية مخصش العجين يكون رطب غي تجمع لك صافي متزيديش الماء انا فهاد المقادير استعملت كاس ونصف ماء
ردوا لبال متكتروش من الماء كنعاود نوصي غي تجمع صافي راه تتكون لعجينة قاصحة شوية وتتبان ليك باقيين طريفات الزبدة فالعجين
ملي تجمعها عمليها فبلاستيك غدائي ودخليها للتلاجة مدة 3 سوايع
نخرجها ونورقها كيف ماتتوضح الصور ونردها مرة تانية للتلاجة مدة 2 سوايع
نعاود نفس العملية ونردها تبرد مرة ثالتة مدة 2 سوايع
نعطيكم الوقت كيفاش وجدتها انا
جمعت العجين مع 10 صباحا
مع 1 مساءا طلقت الطلقة 1
مع 3 مساءا طلقت الطلقة 2
مع 5 مساءا صافي موجودة للتطبيق ورقتها بالمدلك وبديت نشكل منها داكشي لي بغيت
الا كنتوا غادي تحضروا معجنات من الافضل ملي تسرحوا العجين متخليوهش رقيق بزززاف خص السمك يكون عريض شوية وبلا متكوها بالفرشيط خليوها هاكاك
والفرن يكون سخون مزيان وبهكدا غتحصلوا على نتيجة رائعة وبلا عداب بلا فقصة ههههههههه
ان شاء الله ملي تجربوها غتبهروا بالنتيجة وتدعيوا معاى هههههههه
هاهما الاشكال لي خرجت منها نتمنى يعجبوكم
ليست هناك تعليقات:
إرسال تعليق