Loading...

الخميس، 3 يوليو، 2014

وصفة رمضانية ساهلة ماهلة مثلثات و شوصون معمرين بعجينة واحدة من يدياتي




السلام عليكم و رحمة الله و بركاته
عواشركم مباركة أخواتي بكل خير و سلامة و رحمة و عتق من النار فهاد الشهر المبارك
اليوم حبيت نشارك معاكم بوصفة رمضانية ساهلة ماهلة و الأهم أنها لدييييييييدة بزاف
بلا ما نطول عليكم حيت عارفاكم صايمين و ما قادين على هدرة ههههههههه

المقادير
العجين :
2 زلايف طحين فرص
كاس أتاي زيت مخلطة مابين بلدية و رومية
ملح،معلقة كبيرة سنيدة
معلقة كبيرة خميرة عجينة ما عامراش، 1 خميرة حمرا
ماء دافي للعجن أنا احتاجيت تقريبا كوب ماء على حسب نوعية الطحين

الحشوة :
أنا درت بصلة،خيزو وgرعة (كرعة) محكوكين،كفتة،شوية ديال الشحمة مقطعة،ملح ابزار خرقوم سكين جبيرو كمون، قزبر و معدنوس مقطعين
و كاتبقى الحشوة اختيارية انتي و اللي متوفر عندك و حتى الكبدة ديال الدجاج كاتجي زوينة

الطريقة:
أولا كانوجدو الحشوة باش نخليوها تبرد على تيساع
كانشحرو البصلة و الكفتة و الشحمة و الخضرة و نضيفو العطرية حتى يطيب كلشي و نضيفو الكمون و الربيع ماللي نطفيو باش تبقى البنة ديالهم


العجينة ساهلة كانديرو الطحين و الزيت،الملح و السكر و خميرة الحلوى و نخلطو كلشي و نجمعو بالما دافي اللي غانكونو دوبنا فيه الخميرة و نخليوها تعجن مزيان حتى نحصلو على عجينة لينة

كانخليوها ترتاح 5 دقايق

من بعد كانديرو منها كرات اللي كانطلقوهم بالدلاك و نقطعوهم بقطاعة أو زلافة اللي كان عندكم و بالقطر اللي بغينا

أنا هنايا قطعت بهاد الزلافة متوسطة الحجم

وكانبداو نشكلو الأشكال اللي بغينا
أنا درت مثلثات و شوصون نخليكم مع الصور باش نوضح لكم أكتر
هادي طريقة المثلثات





و هادي طريقة الشوصون اللي كلشي كايعرفها أكيد



و من نفس العجينة ممكن ديري كريصات بحال اللي درت أنا أو أي شكل بغيتيه
من بعد ما كملنا كاندهنو المثلثات و الشوصون بصفار البيض و نزينوهم بالحبة السوداء أو اللي موجود عندك و ندخلوهم يطيبو في الفرن يكون سخون


و ها هوما من بعد ما طابو و بالصحة و الراحة
نتمنى ينالو إعجابكم و تجربوهم و تردو علي الخبر

و هادي صورة جماعية ههههه


صحة رمضانكم و كل عام و أنتن بخير و طاعة 



ملاحظة: ممكن تستعملو أخواتي نفس العجينة كعجينة بيتزا راه كاتجي خفيفة و هشييييشة و على حسابي 

ليست هناك تعليقات:

إرسال تعليق