اليوم جبت ليكم واحد الخبيزة معمرة بالطون درتها البارح العشا ماشهيتكم فيها غزاااالة
بالنسبة للعجين غادي نحتاجو
250 غ دقيق
140 غ ماء دافئ
7 غ خميرة
2 م.ك زيت زيتون او عادي لي عجبكم
ربع م.ص ملح
الحشوة
بصلة متوسطة مشلضة
2 فلفة خضرا مقطعين مربعات
1 فلفل احمر صغير مقطع مربعات
2 حكاك طون مصفيين من الزيت
حفينة من الزيتون خضر مقطع
3 م.ك صوص طوماط
زيت زيتون
ابزار
ملح
1ـ كنجمعو جميع المقادير و نخدمو العجين بيدينا شويش لازم يكون لين و ماكيلصقش باليد و نغطيوه و نخليوه يخمر حتى يضاعف الحجم ديالو ( بالنسبة للماء نتوما كتعجنو و نتوما كضيفو الماء على حسب كل دقيق انما تقريبا غدي تاخد ليكم 140 غ ديال الما ) .
2 ـ ناخدو مقلاة و نديرو فيها شويش ديال الزيت و نشحرو فيها البصلة مع الفلفة خضرا و حمرا ملح و ابزار , من بعد ما يتشحرو و ينزلو شويش نضيفو الصوص طوماط و نطفيو عليهم , ز نزيدو الطون مع الزيتون و نخلطو الكل و نخليو الحضوة على جنب تبرد شويش .
3 ـ من بعدما خمرات العجينة ناخدوها و نقسموها على 2 و نطلقو الكورة الاولى بالمدلك على شكل دائري او حسب الشكل لي بغيتو لازم تكون العجينة رقيييقة و نديروها فلاطة ( انا استعملت لاطة ديال البيتزا ) .
4 ـ نوضعو الحشوة من فوق العجين لي عندنا فلاطة , نطلقو النصف المتبقي من العجين و نغطيو به الحشوة نزولو الشايط و جمعو العجينة التحتانية مع العجينة الفوقانية و حنا كنقرصو فيها باش ماتخرجش الحشوة , و بالنسبة للعجين لي شاط نطلقوه و نقطعوه بقطاعات الشكل لي بغينا و نزينو به من الفوق , ندهنو بالبيض و نديرو تقيبات فالخبيزة بقطيب ديال الشوا و ندخلوها الفران حتى طيب و تحمر و بالف صحة و عافية .
نتمنى من الله خبيزتي تنال اعجابكم , في امان الله و الى الملتقى ان شاء الله .
اللهم ادمها نعمة و احفظها من الزوال .
ليست هناك تعليقات:
إرسال تعليق